Þrettán milljarða tap hjá Eimskip

Eimskip tapaði rétt tæpum þrettán milljörðum á öðrum ársfjórðungi samkvæmt afkomutilkynningu sem barst Kauphöllinni nú undir miðnætti. Tapið skýrist að mestum hluta af níu milljarða afskrift félagsins á breska fyrirtækinu Innovate.

Hagnaður félagsins á ársfjórðungnum fyrir skatta, fjármagnsliði og afskriftir nam 5,1 milljarði. Heildartekjur voru 46,9% meiri en á sama tíma í fyrra.

„Tekjur og framlegð á öðrum ársfjórðungi eru í samræmi við okkar væntingar og ánægjulegt er að sjá góðan árangur í flutningastarfsemi í Rússlandi,

Eystrasalti, Norður-Atlantshafssvæðinu, Íslandi og Norður-Ameríku. Auk þess

erum við áfram að sjá góðan rekstur Versacold Atlas. Framtíðarhorfur í rekstri félagsins eru góðar. Flutningastarfsemin er byggð á mjög traustum grunni sem stefnt er að efla enn frekar með innri vexti, og hagræðingu," segir Gylfi Sigfússon, forstjóri Eimskips, í tilkyningunni.

„Þrátt fyrir góðan undirliggjandi rekstur í okkar kjarnastarfsemi hefur afskrift

á eignarhlut í Innovate veruleg áhrif á afkomu Eimskips, auk þess sem

fjármagnsliðir eru áfram háir. Stjórn félagsins hefur sett sér það markmið að

styrkja eiginfjárhlutfall félagsins fyrir lok ársins og að það verði að minnsta

kosti 25%. Í framhaldinu verður góður undirliggjandi rekstur samstæðunnar

sýnilegri og fjármagnskostnaður mun lækka," segir Gylfi ennfremur.