Jafet: Lánardrottnar Eimskips munu fara fram á aðgerðir

Jafet Ólafsson, framkvæmdastjóri fjárfestingafélagsins Veigs, segir í samtali við Vísi að sú staðreynd, að Eimskip uppfylli ekki fjárhagskvaðir allra lánasamninga sinna vegna lágs eiginfjárhlutfalls, sé slæm fyrir félagið ef það verður viðvarandi ástand.

„Þetta er slæmt ef það varir í einhvern tíma. Ég myndi halda að stjórnendur Eimskips fái þrjá til sex mánuði til að laga stöðuna. Það er alveg ljóst að lánardrottnar munu krefjast aðgerða af hálfu stjórnendanna. Í fyrsta lagi er ljóst að reksturinn þarf að batna. Í öðru lagi gætu þeir krafist þess að eigendur félagisns komi inn með nýtt hlutafé og í þriðja lagi gætu þeir farið fram á að eignir verði seldar," segir Jafet.

Hann tekur þó fram að þessi staða hafi engin áhrif á daglegan rekstur Eimskips. „Félagið heldur áfram að þjónusta sína viðskiptavini. En afkoman er afar slæm. Það er ekki hægt að loka augunum fyrir því."