Fjármálaráðherra segist skilja áhyggjur af háum stýrivöxtum

„Við erum að opna möguleika fyrir bankana. Það vita það allir að bankarnir hafa átt erfitt með lausafé og við erum að gera okkar til að hjálpa í því," segir Árni Mathiesen fjármálaráðherra um gagnrýni Hreiðars Más Sigurðssonar, forstjóra Kaupþings.

Hreiðar segir í tölvupósti sem hann sendi frá sér að ákvarðanir ríkisins um að hækka hámarkslán Íbúðalánasjóðs úr 18 í 20 milljónir króna og miða lánsfjárhæð við kaupvirði eignar séu ömurlegar og feli í sér aukin umsvif ríkisins. „Ef það eru bankar sem ekki eru í vandræðum og þurfa ekki á þessu að halda að þá þurfa þeir ekki að nýta sér þessa möguleika. Við erum ekki að þvinga þetta upp á þá," segir Árni

Aðspurður hvort gagnrýni Hreiðars Más sé komin til vegna gremju yfir háum stýrivöxtum segist Árni viðurkenna að háir stýrivextir séu íþyngjandi fyrir viðskiptalífið. „Við erum með sjálfstæðan Seðlabanka sem á að ákveða stýrivextina. Ég eða aðrir ráðherrar eigum ekki að gera það," segir Árni. Hann segist ekki vilja segja skoðanir sínar á stýrivöxtunum en hann geri sér vissulega grein fyrir áhrifum þeirra.

Varðandi ný ríkisskuldabréf segir Árni að útgáfa þeirra sé tilkomin vegna þess að jöklabréfin sem áður hafa verið gefin út muni brátt falla á gjalddaga. „Þá er fólk úti í heimi með krónur og ef það er ekki lengur nein jöklabréfaútgáfa eða eitthvað samsvarandi mun fólk þurfa að selja þessar krónur á markaði," segir Árni. Það muni hafa neikvæð áhrif á gengið og því sé verið að gefa þessu fólki möguleika á því að fjárfesta í krónunni og taka stöðu með krónunni.