Frábær sigur á Rússum - Myndir

Íslenska handboltalandsliðið fékk óskabyrjun á Ólympíuleikunum í Peking með því að vinna sigur á Rússum, 33-31.

Ísland náði snemma frumkvæðinu í leiknum og náðu Rússar aldrei yfirhöndinni. Þegar rúmar fimm mínútur voru til leiksloka var forysta Íslands orðin sjö mörk en liðið hleypti þá Rússum óþarflega nálægt sér.

Arnór Atlason skoraði svo markið sem gulltryggði endanlega sigur íslenska liðsins þegar ein og hálf mínúta var til leiksloka og breytti stöðunni í 32-28.

Tölfræði leiksins má finna neðst í greininni.

Rússarnir voru greinilega langt frá sínu besta og markvarsla beggja liða var af afar skornum skammti í fyrri hálfleik. En íslenski sóknarleikurinn auk góðrar frammistöðu Björgvins Páls Gústavssonar í síðari hálfleik varð til þess að góður sigur íslenska liðsins varð niðurstaðan.

Snorri Steinn Guðjónsson átti stórleik og skoraði tólf mörk, þar af sex úr vítum. Hann nýtti öll skotin sín í leiknum. Auk hans áttu Arnór, Alexander Petersson og Ólafur Stefánsson skínandi góðan leik eins og reyndar liðið allt.

Sturla Ásgeirsson átti til að mynda afar sterka innkomu í vinstra hornið í fjarveru Guðjóns Vals Sigurðssonar sem á við meiðsli að stríða.

Byrjunin á leiknum var svolítið stirð en íslenska liðið var fljótt að hrista stressið af sér og komst í 4-1 forystu. Rússar náðu þó fljótlega að svara fyrir sig og minnkuðu muninn í 5-4.

Þannig gekk þetta lengst af. Ísland komst í 3-5 marka forystu en Rússar náðu alltaf að minnka muninn aftur og halda sér þannig inn í leiknum. Þeir rússnesku gerðu þó gríðarlega mikið af tæknifeilum í sínum sóknarleik og töpuðu mörgum boltum.

Munurinn í hálfleik var þrjú mörk, 19-16. Ísland skoraði fyrstu tvö mörkin í síðari hálfleik en aftur svöruðu Rússar fyrir sig og breyttu stöðunni í 22-21.

Þá fór Björgvin í gang, varði tvö skot í röð og íslenska sóknin gekk á lagið og komst aftur í fimm marka forystu. Eftir það varði Björgvin mörg mikilvæg skot og átti ríkan þátt í því að Ísland náði sjö marka forystu þegar rúmar fimm mínútur voru eftir og sigurinn nánast tryggður.

En Ísland gerði þá þau mistök að slaka á klónni og Rússarnir náðu að koma sér hálfpartinn í leikinn á ný. Guðmundur Guðmundsson tók leikhlé þegar rúmar þrjár mínútur voru til leiksloka og íslensku leikmennirnir kláruðu einfaldlega leikinn.

Tölfræði leiksins:

Ísland - Rússland 33-31 (19-16)

Gangur leiksins: 1-0, 4-1, 5-4, 7-5, 8-8, 10-9, 13-9, 15-13, 18-14, (19-16), 21-16, 22-21, 26-21, 28-24, 31-24, 31-28, 32-28, 32-30, 33-31.

Mörk Íslands (skot):

Snorri Steinn Guðjónsson 12/6 (12/6)

Alexander Petersson 6 (10)

Arnór Atlason 6 (12)

Sturla Ásgeirsson 3 (4)

Ólafur Stefánsson 3 (7/1)

Róbert Gunnarsson 2 (4)

Ásgeir Örn Hallgrímsson 1 (1)

Logi Geirsson (2)

Skotnýting: 33/50, 66%

Vítanýting: Skorað úr 6 af 7.

Varin skot:

Björgvin Páll Gústavsson 9 (33/5, 27%, 50 mínútur)

Hreiðar Guðmundsson 0 (7/2, 10 mínútur)

Mörk úr hraðaupphlaupum: 5 (Arnór 2, Alexander 2 og Ásgeir 1).

Fiskuð víti: Róbert 3, Alexander 1, Ólafur 1, Snorri Steinn 1 og Arnór 1.

Utan vallar: 6 mínútur.

Markahæstir hjá Rússlandi:

Konstantin Igropulo 9/5

Alexander Cherniovanov 5

Alexey Rastvortsev 4

Eduard Koksharov 4/2

Skotnýting: 31/46, 68%

Vítanýting: Skorað úr 7 af 7.

Varin skot:

Oleg Grams 8 (40/6, 18%)

Mörk úr hraðaupphlaupum: 6.

Utan vallar: 12 mínútur.