Æðstu stjórnendur Icelandair ætla ekki að lækka launin sín

Icelandair sagði nýlega upp 240 manns í viðamiklum aðgerðum sem sagðar eru miða að því að endurskipuleggja rekstur félagsins og bregðast við breyttu rekstrarumhverfi vegna hækkandi eldsneytisverðs og óvissu í efnahagsmálum. Birkir Hólm Guðnason framkvæmdastjóri félagsins segir félagið ekki ætla að skera niður laun æðstu stjórnenda fyrirtækisins.

„Það er búið að skoða það og ég held að laun allra starfsmanna Icelandair séu töluvert lægri en gengur og gerist annarsstaðar. Það er ekkert verið að tala um sömu laun og gengur og gerist hjá stórfyrirtækjum í Ameríku og bönkunum hérna," segir Birkir aðspurður um hvort búið sé að skoða hvort skera þurfi niður í launakostnaði hjá æðstu stjórnendum fyrirtækisins.

Þannig að það á ekki að skera niður launakostnað þar? „Nei."

Birkir segir að nú sé unnið að því að skera niður rekstrarkostnað og bendir á að stærsti kostnaðarliður félagsins sé í kringum flugið sjálft og nefnir olíu og starfsmannakostnað þar.

„Því miður er flugiðnaðurinn bara svona í dag."