Útlit fyrir versta hlutabréfaár Kauphallar frá upphafi

Greiningardeild Kaupþings segir að ef fram haldi sem horfi á íslenskum hlutabréfamarkaði og árslokagildi Úrvalsvísitölunnar verði hið sama og nú verði um mestu lækkun á einu ári frá því útreikningur hófst árið 1993.

Í hálffimmfréttum Kaupþings segir að mesta lækkun á ári hingað til hafi verið árið 2000 þegar Úrvalsvísitalan hopaði um 19,3 prósent frá ársbyrjun til ársloka. Úrvalsvísitalan lækkaði um 13,3 prósent á öðrum ársfjórðungi í ár sem einkum verður rakið til 7,8 prósenta lækkunar í júní, en á fyrsta ársfjórðungi féll vísitalan um fimmtung. Hún hefur því lækkað um 29 prósent það sem af er ári.

„Af einstökum félögum eru aðeins þrjú félög sem hafa hækkað í verði frá áramótum sé leiðrétt fyrir arðgreiðslum. Century Aluminum hækkaði langmest eða um 56,7% á fyrstu sex mánuðum ársins en Færeyjabanki hækkaði um 31,7% einkum vegna ríflegrar arðgreiðslu. Sé tekið tillit til gengisbreytinga krónunnar er ávöxtunin þó mun meiri eða um 80% en hlutabréf Færeyjabanka eru skráð í danskri krónu. Alfesca er þriðja félagið með 5,2% hækkun.

Félögin á botni verðbreytingalistans eru hins vegar Teymi (-65,5% frá áramótum), Exista (-61,9%) og SPRON (-61,3%), en síðastnefnda félagið er næmt fyrir gengisbreytingum í Existu," segir í hálffimmfréttum Kaupþings.

Þar er líka bent á að svipaða þróun megi sjá víða á Vesturlöndum að Rússlandi undanskildu en þar hefur Otob-vísitalan verið jákvæð. Helst má rekja hagstætt gengi Otob-vísitölunnar til þess hve mikið vægi olíuiðnaður hefur innan vísitölunnar.