Mikið tjón í Heiðarbrún í Hveragerði

Þau Ingibjörg Garðarsdóttir og Róbert Hlöðversson eru búsett á Heiðarbrún 66 í Hveragerði en í þeirri götu virðist einna mesta eignatjónið í skjálftanum átt sér stað. Ingibjörg segist blessunarlega hafa verið stödd út á götu þegar skjálftinn reið yfir. Hún segist ekki hafa heyrt af meiðslum hjá þeim sem búsettir eru í götunni en tjónið er gífurlegt.

„Það er allt brotið sem getur brotnað hjá okkur," segir Ingibjörg. „Mér sýnist að það séu fjögur glös sem við getum drukkið úr en allt annað er mölbrotið."