Erlendir fjárfestar kaupa tveggja prósenta hlut í Kaupþingi

Umsvifamikil fjölskylda í Bretlandi sem á ættir að rekja til Venesúela, Gertner-fjölskyldan svokallaða, hefur keypt rúmlega tveggja prósenta hlut í Kaupþingi fyrir um 14,5 milljarða króna. Þetta kemur fram á fréttavef Viðskiptablaðsins.

Þar segir að Gertner-fjölskyldan sé umsvifamikil í farsímaviðskiptum, landa-, olíu- og námuviðskiptum og hafi einkum fjárfest í Suður-Ameríku, Bandaríkjunum og Evrópu.

Haft er eftir Sigurði Einarssyni, stjórnarformanni Kaupþings, að Kaupþing hafi þekkt til fjölskyldunnar töluvert lengi. Hann segist mjög ánægður með að fá fleiri erlenda fjárfesta að Kaupþingi og þessi kaup sýni að menn hafi trú á bankanum. Aðspurður segist Sigurður telja að það hafi verið mat Gertner-fjölskyldunnar að evrópskir bankar væru almennt lágt verðlagðir og hún hafi því sé tækifæri í því að kaupa bréf í Kaupþingi.