Segja úrskurð fjármálaeftirlitsins óvandaðan og órökstuddan

Úrskurður Fjármálaeftirlitsins varðandi yfirtöku Sparisjóðs Siglufjarðar á Sparisjóði Skagafjarðar er óvandaður og órökstuddur, að mati hóps stofnfjárhafa í Sparisjóði Skagafjarðar, sem sendi frá sér yfirlýsingu fyrir stundu.

Stofnfjárhafarnir segja að enn sé ósvarað fjölda fyrirspurna og alvarlegra athugasemda sem beint hafi verið til FME er varði lögmæti samrunaferlisins og meðferðar stofnfjárhluta og lögmæti aðalfundar sjóðsins. Í úrskurðinum segi hinsvegar „Fjármálaeftirlitinu bárust nokkrar ábendingar frá stofnfjáreigendum í Sparisjóði Skagafjarðar vegna fyrirhugaðs samruna og hefur öllum sem sendu inn ábendingar verið svarað skriflega" Stofnfjárhafarnir, sem standa að yfirlýsingunni, segja að þetta sé einfaldlega rangt. Þá hafi Fjármálaeftirlitið í tvígang verið beðið um gögn er varði samrunann og í bæði skiptin hafnað því. Í ljósi þeirra alvarlegu athugasemda sem komið hafi fram og þess langa tíma sem liðinn sé frá aðalfundi sparisjóðsins sé óviðunandi að FME skuli ekki færa haldbær rök fyrir niðurstöðu sinni.

„Aðalfundur Sparisjóðs Skagafjarðar þann 13. ágúst síðastliðinn samþykkti yfirtöku Sparisjóðs Siglufjarðar á sjóðnum. Atkvæðaseðlar um yfirtökuna voru 96. Af þeim voru 60 stofnfjáreigendur í Skagafirði sem höfnuðu yfirtökunni en 36 sem samþykktu. Úrslitum réði að samstæða Kaupfélags Skagfirðinga hafði selt mestan hluta stofnfjár síns út úr héraði, virka eignarhluti, til valinna aðila," segir í yfirlýsingunni.

Undir yfirlýsinguna skrifa, Sigurður Guðmundsson, Sverrir Magnússon, Gísli Árnason, Gunnar Rögnvaldsson, Sigurður Þorsteinsson og Bjarni Jónsson.