Spá að ávöxtunarkrafa íbúðabréfa lækki áfram

Samkvæmt nýrri spá greiningar Glitnis um þróun ávöxtunarkröfu íbúðabréfa er gert ráð fyrir því að krafan muni halda áfram að lækka í mars.

Næsti vaxtaákvörðunardagur Seðlabankans er 10. apríl. Greiningin reiknar með lækkun stýrivaxta þá og að stýrivextir verði 11% lok árs og 7% í lok ársins 2009, en þetta er talsvert hraðara lækkunarferli en áður var reiknað með.

Skammvinnur verðbólgukúfur er þar að auki væntanlegur nú á fyrri hluta ársins í kjölfar veikingar krónunnar og verðbólga til skamms tíma því meiri. Jafnframt gerir breyting á mælingu vísitölu neysluverðs það að verkum að árstíðarsveiflan breytist lítillega sem framkallar meiri hækkun í febrúarmælingu en áður var vegna útsöluloka.

Þróun á kröfu íbúðabréfa hefur þegar tekið tillit til ofantalinna þátta að miklu leyti og krafan lækkað töluvert, en við gerum ráð fyrir að hún muni síga frekar á næstu vikum.

Á seinni helmingi þessa árs teljum við að ávöxtunarkrafa íbúðabréfa muni halda áfram að lækka samhliða lækkunarferli stýrivaxta. Lækkun kröfunnar mun þó að öllum líkindum vera hægari þar sem mikill hluti lækkunarinnar er þegar kominn fram.