Ákvörðun ríkisstjórnarinnar úr takti við vaxtastefnu Seðlabankans

Sigurjón Árnason, bankastjóri Landsbankans, segir að með þeim aðgerðum sem ríkisstjórnin kynnti í gær sé verið að reyna að liðka um fyrir sparisjóðunum að hluta til. „Og ég held að það séu hagsmunir okkar að allar fjármálastofnanir gangi vel," sagði Sigurjón í samtali við Vísi.

Samkvæmt ákvörðunum sem ríkisstjórnin kynnti í gær hækka hámarkslán Íbúðalánasjóðs úr 18 í 20 milljónir króna og lánsfjárhæð verður miðuð við kaupvirði eignar, en ekki brunabótamat eins og verið hefur.

Í tölvupósti sem Hreiðar Már Sigurðsson, forstjóri Kaupþings, sendi Samtökum fjármálafyrirtækja vegna þessa ákvörðunar og birtur er á vef Viðskiptablaðsins segir: „Þetta eru ömurleg tíðindi fyrir íslenskan fjármálamarkað. Lausnin á að felast í auknum umsvifum ríkisins á fjármálamarkaði," segir Hreiðar og bendir á að að ekki gangi að gefa út ríkisskuldabréf á 15% vöxtum.

Þetta sjónarmið tekur Sigurjón undir. „Ég er sammála því að mikilvægt sé að lækka vexti, Ég er sammála því að skrýtið er að hafa íbúðalánasjóð eins og hann er en hafa vextina jafn háa og þeir eru," segir Sigurjón. Sigurjón segir þó að í heildina litið sé ríkisstjórnin að reyna að hjálpa til og mikilvægt sé að taka viljann fyrir verkið.