Arnór: Eigum mikið inni

„Það er tilbreyting að vera ekki búinn að mála sig út í horn eftir fyrsta leik," sagði Arnór Atlason brosandi eftir leik. Arnór átti ágætan leik, mistækur á köflum en læt það ekki slá sig út af laginu, hélt áfram að vera grimmur og skilaði mjög góðum mörkum og þar á meðal markinu sem endanlega kláraði leikinn.

„Það eru fjórir leikir eftir og margt getur enn gerst í þessum riðli. Við vorum vel undirbúnir og gerðum það sem fyrir okkur var lagt. Við erum búnir að bíða lengi eftir þessum leik. Við vildum vinna þennan leik og vissum að við gætum það með eðlilegum leik."

„Við eigum enn mikið inni. Erum ekki að skora mikið úr hraðaupphlaupum og annað.Ég get því ekki verið annað en bjartsýnn á framhaldið. Þetta var bara fyrsti leikur af vonandi átta leikjum," sagði Arnór.