Ólafur: Vinnum ekki Rússa á hverjum degi

Ólafur Stefánsson, fyrirliði íslenska handboltalandsliðsins, segir að allir leikmenn hafi lagt sitt af mörkum í sigri Íslands á Rússlandi í nótt.

„Það er alltaf léttir að vinna leiki. Gott að vinna Rússa því við leggjum þá ekki á hverjum degi. Þetta er mjög ánægjulegt. Gaman að sjá framlag frá hverjum einasta leikmanni og meira að segja líka frá Gaua á bekknum sem var til í að koma líka inn á þótt það hefði átt að banna honum það," sagði Ólafur Stefánsson landsliðsfyrirliði sem hafði óvenju hljótt um sig í leiknum og lét sér nægja að skora þrjú mörk að þessu sinni.

„Við vöknuðum klukkan 6 í morgun og það er fínt að spila bara snemma og vera búinn með þennan leik. Þjóðverjar eru næstir og gaman að mæta þeim. Við byrjuðum skelfilega á móti þeim í Noregi. Það verður erfiður leikur en það er fullt af veikleikum í þeirra liði sem við verðum að nýta okkur," sagði Ólafur.