Fullyrðingar um andlát Icebank stórlega ýktar

Agnar viðurkennir í samtali við Vísi að árið hafi reynst erfitt og að bankinn hafi þurft að afskrifa um fjóra milljarð og þá hafi félagið tapað á lækkun hlutabréfa í Exista. Samkvæmt hálfsársuppgjöri Icebank nam tap hans á fyrri helmingi ársins 2,8 milljörðum króna en Agnar bendir á að eigið fé bankans sé um ellefu milljarðar.

Aðspurður hvort forsvarsmenn Icebank hafi átt í þreifingum við önnur fjármálafyrirtæki vegna versnandi stöðu á fjármálamarkaði segir Agnar að hann hafi látið hafa það eftir sér að hans draumsýn væri að ná sparisjóðakerfinu í einn banka sem yrði fjórða stoðin á bankamarkaði. Ljóst er að það verður ekki því útlit er fyrir að SPRON sameinist Kaupþingi og Byr Glitni.

Icebank hefur lagt áherslu á heildsölu- og fjárfestingarbankastarfsemi gagnvart sparisjóðum landsins og eiga sparisjóðirnir í landinu ríflega helmingshlut í Icebank. Afganginn eiga helstu stjórnendur og ýmsir aðrir fjárfestar.

Icebank er stærsti lánadrottinn sparisjóðanna og segir Agnar að staða þeirra hafi breyst mjög á árinu. Jafnvægi hafi lengi verið á milli eigna og skulda þeirra en nú nemi skuldir sparisjóðanna við Icebank um 30 milljörðum króna. Mestur hluti skuldanna sé vegna erlendra lána þeirra.

Icebank hafi lokið endurfjármögnun í vor ekkert lán sé á gjalddaga fyrr en á sama tíma að ári. Þá segir Agnar að bankinn hafi þroskast og farið að þjónusta fleiri aðila og aukið þannig tekjur sínar. Því kannast hann ekki við að bankinn sé kominn í þrot.