Ingibjörg Pálmadóttir næsti stjórnarformaður FL Group

Ingibjörg Pálmadóttir verður næsti stjórnarformaður FL Group. Þetta herma öruggar heimildir Vísis en hluthafafundur FL Group stendur nú yfir.

Tekur Ingibjörg við formennskunni af eiginmanni sínum, Jóni Ásgeiri Jóhannessyni, sem verður, einnig samkvæmt heimildum Vísis, endurkjörinn stjórnarformaður Magasin du Nord í dag. Pálmi Haraldsson og Hannes Smárason munu heldur ekki gefa kost á sér áfram til stjórnarsetu í FL Group.

Ekki náðist í Jón Ásgeir en samkvæmt 66. grein laga um hlutafélög þá er honum óheimilt að sitja í stjórnum hlutafélaga næstu þrjú árin vegna þriggja mánaða skilorðsbundins dóms sem hann fékk í Baugsmálinu.

Stjórn FL Group verður þá skipuð eftirtöldum: Ingibjörgu Pálmadóttur, Árna Haukssyni, Eiríki S. Jóhannessyni, Katrínu Pétursdóttur og Þorsteini M. Jónssyni.