Vegfarandi undir Ingólfsfjalli segist aldrei hafa lent í öðru eins

Kristinn Guðlaugsson var á ferð í sendiferðabíl undir Ingólfsfjalli þegar jarðskjálftinn reið yfir. Hann segist aldrei hafa lent í öðru eins.

"Þetta er eitt það rosalegasta sem ég hef lent í á ævinni. Bílinn hoppaði og skoppaði á veginum. Það var rúta full af fólki fyrir aftan okkur og vörubíll fyrir framan okkur sem áttu í mestu vandræðum með að halda sér á veginum.

Það munaði mjög litlu að illa færi. Ingólfsfjall var einn reykjarmökkur. Ég hef aldrei séð annað eins. 17. júní skjálftinn var ekki neitt miðað við þetta," segir Kristinn.