Krónubréf fyrir 20 milljarða hafa fallið á gjalddaga í mánuðinum

Ekki var framlengt í útgáfu krónubréfa upp á fimm milljarða króna sem runnu út í dag. Það hafði hins vegar engin teljandi áhrif á gengi krónunnar, eftir því sem segir í hálffimmfréttum Kaupþings.

„Skortur á lausafé hefur gert útgefendum krónubréfa erfitt fyrir að nýta sér háa íslenska vexti í gegnum gjaldeyrisskiptamarkað og hefur hvatinn fyrir útgáfu nýrra krónubréfa því verið takmarkaður síðan lausafjárskorturinn skall á af öllu afli. Helst hafa fjárfestar snúið sér að ríkisskuldabréfum til að nýta sér vaxtamun milli hagkerfa.

Útgefendur krónubréfa munu sjá sér lítinn hag í því að framlengja bréfum sínum þegar nær dregur gjalddaga snúi lausafjárskorturinn ekki til betri vegar í tæka tíð. Gæti það í raun þýtt að krónan haldist veik meðan útistandandi krónubréf mjatla nær gjalddaga fari svo að alþjóðleg lausafjárþurrð lagast ekki. Seðlabankinn gæti mætt slíkri atburðarrás með aukinni útgáfu skuldabréfa en stór galli við slíka aðgerð væri enn aukinn skortur á krónum sem myndi þrengja að fjármálastofnunum og takmarka frekar útlán innanlands með tilheyrandi hættu á samdrætti," segir í hálffimmfréttum.