Landic riftir samningi við Stones og útilokar ekki lögsókn

Landic Property hefur rift samningi sínum við Stones Invests um söluna á danska félaginu Keops Development. Þetta kemur fram í tilkynningu frá Landic. Þar segir enn fremur að Landic hafi á ný tekið við eignarhaldi á Keops Development með það fyrir augum að vernda fjárhagslega hagsmuni sína, verðmæti Keops Development og hagsmuni viðskiptafélaga og viðskiptabanka félagsins.

Eins og fram hefur komið ákvað Stones Invest að rifta samningnum við Landic vegna vanefnda og hefur boðað skaðabótamál upp á fjóra milljarða króna. Forsvarsmenn Landic segja hins vegar að félagið hafi uppfyllt allar skyldur sínar samkvæmt kaupsamningi.

 „Hins vegar hefur Stones Invest meðal annars ekki staðið við þau ákvæði kaupsamningsins um að losa Landic Property undan ábyrgðum sínum og að framfylgja ítarlegri áætlun um sjóðstreymi til að tryggja greiðslur til banka og þróunaraðila verkefna á vegum Keops Development," segir í tilkynningu Landic.

Þá segir Landic að Stones hafi tekið tekið til sín endurgreiðslur á virðisaukaskatti sem nemi rúmlega 22 milljónum danskra króna og sem hefðu með réttu átt að renna inn á bankareikning Keops Development.

„Keops Development og dótturfélög eru án stjórna þar sem stjórnarmeðlimir skipaðir af Stones Invests hafa sagt af sér sem gerir það að verkum að Keops Development uppfyllir ekki reglur um stjórn félaga," segir enn fremur í tilkynningunni.Enn fremur segjast forsvarsmenn Landic ekki treysta Stones Invest og til þess að koma í veg fyrir frekari rýrnun verðmæta að völdum Stones Invests hafi Landic rift kaupsamningnum og tekið yfir eignarhald og stjórnun á Keops Development.

„Framkvæmdarstjórn og stjórn Stones Invests hafa með atferli sínu sýnt mikla vanrækslu gagnvart Landic Property, Keops Development og öllum þeim er hlut eiga að máli. Landic Property áskilur sér rétt til þess að grípa til hvers kyns nauðsynlegra lagalegra aðgerða gagnvart Stones Invest og stjórn fyrirtækisins," segir einnig í tilkynningunni.