Stjónvöld þurfa að auka gjaldeyrisforaðnn sem fyrst

Krónan féll um rúmlega 3 prósent í gær og hefur aldrei verið veikari. Ríkið þarf auka gjaldeyrisforðann sem fyrst til að styðja við krónuna að mati sérfræðinga.

Krónan veiktist um 3,6 prósent í gær og stóð gengisvísitalan í 164,8 stigum í lok dags. Hefur krónan aldrei áður mælst veikari. Í hálffimfréttum Kaupþings kemur fram að frá áramótum hefur krónan veikst um 37 prósent.

Um síðustu áramót var bandaríkjadalur 62 krónur en er nú rétt rúmlega áttatíu samkvæmt miðgengisskráningu Seðlabankans. Danska krónan var tólf krónur í byrjun árs en í lok markaðar í gær var hún komin í rúmar 16 krónur. Evran var nítíu og ein króna í byrjun árs en fór í hundrað tuttugu og fjórar krónur í gær. Frá áramótum hefur krónan veikst um 40 prósent gagnvart evrunni sem er sögulegt met.

Krónan styrktist eilítið við opnun markaðar í morgun og um klukkan ellefu nam styrkingin um 0,8 prósentum.

Í Vegvísi greiningar Landsbankans kemur fram að verðbólga hafi aukist mjög mikið í kjölfar veikingar krónunnar í vetur. Of snemmt sé spá til um hvort gengislækkunin nú verði varanleg og um áhrif hennar á verðlag í landinu.

Sérfræðingar sem fréttastofa Stöðvar 2 hefur talað við eru almennt sammála um að sá dráttur sem orðið hefur á því að ríkið auki gjaldeyrisforða sinn hafi aukið á óvissuna og væntanlega átt sinn þátt í falli krónunnar í gær.