Eimskip gæti þurft að afskrifa milljarða

Svo gæti farið að Eimskip þurfi að afskrifa milljarða vegna kaupa sinna á breska fyrirtækinu Innovate Holdings í fyrra. Kaupverð var um tíu milljarðar á núverandi gengi en eftir nánari skoðun reyndist félagið ekki eins öflugt og gert var ráð fyrir í upphafi.

Samkvæmt heimildum Vísis hefur slæmur rekstur og bág eiginfjárstaða gert það að verkum að forráðamenn Eimskips róa nú öllum árum að því að selja allt sem hægt er að selja út úr fyrirtækinu til að lágmarka skaðann. Eftir því sem Vísir kemst næst verður þó ekki komið í veg fyrir að afskrifa þurfi stóran hluta kaupverðsins.

Þetta eru auðvitað slæm tíðindi fyrir Eimskip sem hefur fundið fyrir erfiðum markaðsaðstæðum líkt og önnu félög á markaði. Gengi bréfa í félaginu hefur lækkað um 42,2% frá áramótum. Ekki er vitað hvort þessar milljarðaafskriftir verði færðar til bókar í sex mánaða uppgjöri félagsins sem birt verður á föstudaginn í næstu viku.

Halldór Kristmannsson, framkvæmdastjóri samskiptasviðs Eimskips, vildi ekki tjá sig um málið þegar Vísir ræddi við hann í dag. Ekki náðist í Gylfa Sigfússon, forstjóra félagsins.