Gistinóttum fjölgaði um tæpt 1% milli ára

Gistinætur á hótelum í apríl síðastliðnum voru 91.100 en voru 90.200 í sama mánuði árið 2007. Gistinóttum fjölgaði því um tæpt 1% milli ára.

Þetta kemur fram á vefsíðu Hagstofunnar í morgun. Þar segir að hlutfallslega fjölgaði gistinóttum mest á Suðurlandi, um 25%, og tæpt 1% á höfuðborgarsvæðinu. Gistinætur fóru úr 9.700 í 12.100 á Suðurlandi og úr 63.600 í 64.000 á höfuðborgarsvæðinu.

Hlutfallsleg fækkun gistinátta var mest á samanlögðu svæði Suðurnesja, Vesturlands og Vestfjarða þar sem gistinóttum fækkaði úr 7.000 í 5.800 eða um rúm 16%.

Á Austurlandi fækkaði gistinóttum um tæp 15%, úr 3.100 í 2.700. Á Norðurlandi fækkaði gistinóttum einnig, úr 6.800 í 6.400, eða um tæp 6%.