Sigurjón segir ummæli bankastjóra Rabobank óheppileg

Sigurjón Árnason, bankastjóri Landsbankans, segir nýleg ummæli Bert Heemskerk, bankastjóra Rabobank, í hollenska ríkissjónvarpinu óheppileg.

Rabobank er stærsti bankinn í Hollandi en Hemskerk réðst harkalega að trúverðugleika Landsbankans í viðtali þar í landi í gærkvöld. Þar líkti hann bankanum við tyrkneskan banka, hvað sem það kann að þýða.

Þá sagði Heemskerk að hollenskur almmeningur væri að kaupa köttinn í sekknum með því að skipta við Landsbankann þar sem innlánsvextir hans gætu aldrei verið jafn háir til frambúðar í Hollandi eins og nú.

„Þessi ummæli eru ekki heppileg fyrir neinn, hvorki hann né okkkur," segir Sigurjón Árnason um málið.

Hann segir ummæli Heemskerk viðbrögð við nýjum aðstæðum þar sem bankar geta keppt við hvern annan með mjög opnum hætti á Netinu.

„Við erum sannfærð um að það sé pláss fyrir alla á þessum markaði. Við ógnum ekki Rabobank þannig séð. Ég á því erfitt með að skilja þessi ummæli," segir Sigurjón.