Einkunn TM lækkuð vegna skulda FL Group

Alþjóðlega matsfyrirtækið Standard & Poor's hefur lækkað einkunn Tryggingamiðstöðvarinnar hf. og dótturfélags þess, Nemi Forsikring ASA í Noregi, úr BBB í BBB-.

Horfur fyrirtækjanna eru metnar stöðugar. Eftir því sem segir í tilkynningu til Kauphallarinnar er meginástæða þess að matsfyrirtækið grípur til þessarar ráðstöfunar skuldastaða FL Group, móðurfélags Tryggingarmiðstöðvarinnar.

Þar segir einnig að í tilkynningu Standard & Poor's komi fram að eftir viðræður við stjórnendur FL Group álykti matsfyrirtækið að enn sé til staðar sú áhætta að eigið fé TM rýrni þrátt fyrir opinberar reglur, stjórnunarhætti og aðrar ráðstafanir sem koma eiga í veg fyrir slíkt. Það sé hins vegar álit S&P að hæfni TM og Nemi til að standa við viðskiptalegar skuldbindingar sínar sé óbreytt.

„Stjórn TM lýsir yfir vonbrigðum sínum með þessa niðurstöðu og bendir á að fjárhagsleg staða TM og Nemi sé mjög sterk og félögin hafi sömu burði og áður til þess að þjóna viðskiptavinum sínum til framtíðar," segir í tilkynningu TM.