Hafna margfaldri kreditkortaþóknun

„Það er andstætt góðum viðskiptaháttum að lauma kortum inn á markaðinn með þeim hætti sem hér virðist hafa verið á hafður,“ segir í bréfi Samtaka verslunar og þjónustu (SVÞ), sem félagsmenn fengu í hendur um miðjan mánuðinn.

Bréfið fjallar um nýlega útgáfu American Express-greiðslukorta. Samtökin gagnrýna að þessi kort séu aðeins gerð upp mánaðarlega auk þess sem söluþóknun sé tvö- til fjórföld á við það sem algengast sé hér á markaði. Þá er miðað við það sem almennt gildir um Mastercard og Visa-kort.

„Út af fyrir sig er ekkert við því að segja að kort sem ber svo mikið af fríðindum sé gefið út, en afstaða SVÞ er sú að korthafar eigi að greiða fyrir þau fríðindi en ekki söluaðilar [...],“ segir í bréfinu.

Kvartað hafi verið undan þessu við samtökin.

Finnur Árnason, forstjóri Haga, segir að tekið sé við kortinu í verslunum Haga. Þar á meðal eru Karen Millen, Útilíf, Oasis og fleiri. „Við stöndum í samningum við Borgun vegna þessara korta. Þóknunin er hærri en á öðrum kortum og ekki mikið svigrúm fyrir því.“ Hann segir líklegt að samningum ljúki á allra næstu dögum. „Það er aðkallandi að klára þetta.“ 

Hermann Guðmundsson, forstjóri N1, sem rekur Bílanaust, bensínstöðvar og fleira, segir að ekki sé hægt að sætta sig við þau kjör sem boðin voru á kortinu. „Við erum að fara yfir þessi mál og bíðum þess að Borgun geri okkur tilboð sem við sættum okkur við.“

Málið er einnig til skoðunar hjá Norvik, sem rekur fjölmargar verslanir hérlendis.

Haukur Oddson, forstjóri Borgunar, sem gefur kortið út, segir að um tuttugu seljendur hafi haft samband við fyrirtækið en enginn hafi sagt upp samningum. Rætt sé við aðila um kjör en samningar við hvern og einn séu trúnaðarmál. „En okkur þykir afar óviðeigandi að samtök eins og SVÞ veitist gegn einni vöru á markaði.“

ingimar@markadurinn.is