Forsætisráðherra: Gengi krónunnar ýkt

Búist hafði verið við veikingu krónunnar í kjölfar loka stórframkvæmda en staða hennar nú er ýkt að mati Geirs H. Haarde forsætisráðherra sem í morgun ávarpaði málþing fjárfesta í Lundúnum.

Hann sagði krónuna fyrir neðan jafnvægisgengi en eins og fram hefur komið hefur gengið aldrei verið veikara og kostar evra nú yfir 130 krónur. Breska blaðið Guardian greinir enn fremur frá því að Geir hafi sagt á málþinginu að viðskiptahalli myndi minnka og ná sjálfbærni og þá myndu stýrivextir lækka.

Guardian greinir enn fremur frá því að samdráttur á fyrsta ársfjórðungi þessa árs í íslenska hagkerfinu hafi numið 3,7 prósentum frá fyrra ársfjórðungi og að bankarnir í landinu hafi safnað miklum skuldum á undanförnum árum. Þess vegna hafi vaknað áhyggjur af stöðu Íslands í þeirri lánsfjárkreppu sem gengi yfir heiminn og það hefði bitnað á gengi krónunnar.

Geir sagði sagði kosti eigin gjaldmiðlis fleiri en gallana og blés því á upptöku evru. „Með því að hafa eigin gjaldmiðil búum við yfir sveigjanleika sem ekki gefst kostur á í myntsamstarfi," sagði Geir. „Ég tel að þegar Seðalbanki Evrópu tekur sínar ákvarðanir í Frankfurt hugsi hann ekki um Ísland," sagði Geir.