,,Ég er mjög ánægður"

Forstjóri Sparisjóðs Reykjavíkurs og nágrennis er afar ánægður með niðurstöðu hlutahafafundar SPRON varðandi fyrirhugaðan samruna við Kaupþing. ,,Ég er mjög ánægður með að þessi áfangi er nú að baki og að tillagan hafi fengið jafn afgerandi stuðning hluthafa," segir Guðmundur Hauksson.

Hluthafafundur SPRON samþykkti í kvöld samrunann við Kaupþing með ríflega 80% atkvæða.

Talsverður hiti var á fundinum. ,,Það liggur alveg ljóst fyrir að ýmsir hluthafar eru ósáttir. Hlutabréfin hafa lækkað í verði og fólk orðið af einhverjum eignum. Aftur á móti á það auðvitað við hlutahafa nær allra hlutafélaga í landinu," segir Guðmundur.

,,Sumir áttu þessi hlutabréf ekki endilega fjárfestingarinnar vegna og af þeim sökum snertir þetta menn með ýmsum hætti þannig að ég átti alveg von á því að fram kæmu ýmis sjónarmið."

Nú eiga bæði Fjármálaeftirlitið og Samkeppniseftirlitið eftir að leggja blessun sína yfir samrunann. ,,Eftirlitsaðilarnir fara í gegnum ákveðna vinnu og svo heyrum við hvað þeir hafa að segja," segir Guðmundur sem vildi ekki spá fyrir hversu langan tíma sú vinna taki. Hann á þó von á því að af formlegum samruna verði á haustmánuðum.