Kreditkortavelta heimila var 14,2% meiri en í fyrra

Kreditkortavelta heimila var 14,2% meiri í janúar-apríl 2008 en á sama tíma í fyrra. Debetkortavelta jókst um 2,4% á sama tíma.

Þetta kemur fram í hagvísum Hagstofunnar. Samtals jókst innlend greiðslukortavelta heimila í janúar-apríl 2008 um 8,5%. Kreditkortavelta Íslendinga erlendis jókst um 19,8% en erlend greiðslukortavelta hérlendis dróst saman um 5,0% í janúar-apríl 2008 miðað við sömu mánuði 2007.

Á sama tíma hækkaði vísitala neysluverðs án húsnæðis um 5,8% sem veldur 2,7% raunhækkun á innlendri greiðslukortaveltu.

Nýskráningar bíla í janúar-maí 2008 voru 7.397 sem er 11,2% fækkun frá sama tímabili í fyrra. Síðastliðna 12 mánuði, til loka maí, voru nýskráningar bíla 21.669 en það er 7,3% aukning frá fyrra tólf mánaða tímabili.