Vanskil útlána að aukast í fyrsta sinn síðan 2002

Fjármálaeftirlitið hefur tekið saman tölur um vanskil útlána hjá innlánsstofnunum miðað við lok mars 2008 og samanburð við næstu ársfjórðunga á undan. Sýna tölurnar að vanskilin eru að aukast í fyrsta sinn frá árinu 2002.

Yfirlitið sýnir að hlutfall vanskila af útlánum í lok 1. ársfjórðungs í ár er 0,5% samanborið við 0,4% í árslok 2007. Í lok fyrsta ársfjórðungs 2007 var hlutfallið 0,6%.

Vanskilin eru samkvæmt framansögðu að aukast á ný eftir nær samfellda lækkun frá seinni hluta árs 2002. Athuga ber að útlánaaukningin á undanförnum misserum kann að koma fram í auknum vanskilum síðar.

Hafa ber í huga að þátttaka innlánsstofnana í fasteignalánum frá og með seinni hluta ársins 2004 kann að hafa haft áhrif á þróun vanskila sem sýnd eru á yfirlitinu, einkum vanskilahlutfall einstaklinga.

Vanskilahlutfall fyrirtækja er 0,5% í lok 1. ársfjórðungs í ár samanborið við rúmlega 0,3% í árslok 2007. Í lok 1. ársfjórðungs 2007 var hlutfallið 0,6%. Vanskilahlutfall fyrirtækja miðað við eins árs tímatöf er 0,9% samanborið við 0,5% í árslok 2007.

Vanskilahlutfall einstaklinga er tæplega 0,8% í lok 1. ársfjórðungs 2008 samanborið við 0,7% í árslok 2007. Í lok 1. ársfjórðungs 2007 var hlutfallið rúmlega 0,8%.

„Vanskil útlána hjá innlánsstofnunum í lok fyrsta ársfjórðungs 2008 eru byrjuð að vaxa á ný eftir nær samfellda lækkun frá árinu 2002. Vanskilahlutföllin eru þó enn svipuð og þau voru á árunum 2006 og 2007." Segir Ragnar Hafliðason hjá Fjármálaeftirlitinu.