Þórður Birgir selur Parket og gólf - bankinn bað nýjan eigenda að kaupa

Þórður Birgir Bogason, fyrrverandi forstjóri Mest og eigandi Parkets og gólfs, hefur hætt öllum afskiptum af fyrirtækinu. Heimildir Vísis herma að Glitnir, helsti lánadrottinn fyrirtæksins, hafi haft samt við núverandi eiganda Skapta Harðarson og boðið honum að kaupa það áður en fjárhagsvandræði þess yrðu því ofviða.

Skapti vildi hvorki játa því né neita að bankinn hefði haft milligöngu um kaupin á Parketi og gólfi þegar Vísir hafði samband við hann. Skapti neitar því þó ekki að fjárhagsstaðan hafi verið bág þegar hann tók við fyrirtækinu.

„Það er ekki hægt að neita því að það var í vandræðum fjárhagslega enda hefur veltan dregist verulega saman að undanförnu. Nú tekur við algjör endurskipulagning á fyrirtækinu,“ segir Skafti.

Þórður Birgir Bogason sagði í samtali við Vísi að Parket og gólf hefði verið í fínum málum þegar hann seldi það. Allt tal um annað væri rugl. Aðspurður um af hverju hann hefði selt svaraði hann: "Ég fékk einfaldlega gott tilboð sem var ekki hægt að hafna."

Þórður Birgir keypti Parket og gólf á fyrri hluta síðasta árs. Heimildir Vísis herma að kaupin hafi verið fjármögnuð að mestu leyti með lánum. Gengisbreyting og samdráttur í veltu hafi síðan haft þau áhrif að það var nánast komið að fótum fram fjárhagslega samkvæmt heimildum Vísis.