Útflutningur aldrei mælst meiri

Vöruskipti við útlönd voru óhagstæð um 0,6 ma.kr. í maí samkvæmt bráðabirgðatölum Hagstofunnar. Hallinn er töluvert minni en í apríl en þá var hann 7,3 ma.kr. Alls nam útflutningur tæpum 39,3 mö.kr. í mánuðinum en innflutningur nam 39,9 mö.kr.

Þetta kemur fram í Vegvísi Landsbankans í dag. Þar segir ennfremur:

„Bata vöruskiptahallans má rekja til þess að útflutningur hefur aldrei mælst meiri. Að öllum líkindum er álútflutningur að aukast töluvert en álver Fjarðaáls á Reyðarfirði náði fullum afköstum um miðjan apríl. Á sama tíma er innflutningur þó enn mjög hár í sögulegu samhengi. Ekki liggur fyrir sundurliðun á inn- og útflutningi og því erfitt að rýna nánar í tölurnar að sinni en óreglulegir liðir gætu haft áhrif á niðurstöðu mánaðarins. Hagstofan birtir endanlegar tölur um vöruskiptin í maí ásamt sundurliðun þann 30.júní.

Veiking krónunnar undanfarna mánuði ætti að öðru óbreyttu að leiða til minni innflutnings en þau áhrif koma fram með nokkurri töf. Til að byrja með gætir verðáhrifanna eingöngu og því eykst innflutningur í krónum talið eftir lækkun gengisins. Við eigum von á að innflutningur dragist saman þegar líður á árið en þá mun gengisveiking krónunnar koma til með að hafa jákvæð áhrif á vöruskiptahallann. Að okkar mati er jákvætt að sjá svo mikinn bata í utanríkisviðskiptum í maí en við væntum þess að afgangur myndist á vöruskiptum á næstu mánuðum.“