Fékk leyfi til að kveðja systkini sín

„Hann fékk leyfi til að fara til Noregs og kveðja systkini sín," segir Sveinbjörg Karlsdóttir móðir Kalla Bjarna sem fór úr landi áður en hann átti að hefja afplánun á tveggja ára fangelsisdómi vegna kókaínsmygls.

DV greindi frá því í morgun að Kalli Bjarni væri farinn úr landi og sagði Sveinbjörg ósköp eðlilegar skýringar á því. „Það er enginn feluleikur. Hann fékk leyfi frá fangelsismálastofnun til að fara með mér til Noregs."

Aðspurð segir Sveinbjörg að sonur hennar sé illa farinn eftir síðasta sukktúr en sé þó edrú núna. Hann mun snúa tilbaka til Íslands í lok apríl og fara beint í afplánun að sögn Sveinbjargar.

Systir Kalla Bjarna er búsett í Noregi en þar mun hann einnig kveðja hálfsystur sína og hálfbróður.