Tveir af þremur stærstu hluthöfum FL Group úr stjórn

Þrír af mest áberandi viðskiptamönnum Íslands á undanförnum árum, Jón Ásgeir Jóhannesson, Pálmi Haraldsson og Hannes Smárason, hurfu á einu bretti út úr stjórn FL Group í morgun. Pálmi og Hannes eru báðir í hópi þriggja stærstu hluthafa félagsins.

Ekki þarf að fara mörgum orðum um ástæður þess að Jón Ásgeir víkur sæti úr stjórn FL Group. Lög um hlutafélög gera honum ekki kleift að sitja í stjórnum íslenskra félaga næstu þrjú árin vegna þriggja mánaða skilorðsbundins dóms sem hann fékk á dögunum í Baugsmálinu. Ekki hefur náðst í Jón Ásgeir í morgun.

Pálmi er annar eiganda Fons sem á 12,2% hlut í FL Group. Fons kom inn í hluthafahóp FL Group í byrjun desember á síðasta ári og má lauslega áætla að hlutur þess í félaginu hafi rýrnað um 13 milljarða miðað við gengi dagsins í dag. Ekki náðist í Pálma í morgun.

Hannes Smárason er eigandi eignarhaldsfélagsins Oddaflug BV sem skráð er í Hollandi. Oddaflug BV á 10,8% hlut í FL Group. Ljóst er að Hannes hefur farið gífurlega illa út þeirri miklu lækkun sem orðið hefur á gengi bréfa í félaginu á undanförnum mánuðum. Hann er enn eftir því sem best er vitað eigandi Oddaflugs BV og mun því sitja með hlut sinn án þess að hafa nokkur völd. Hannes sagði í samtali við Vísi að það væri enginn sérstök ástæða fyrir því að hann hætti í stjórninni. „Menn hafa sínar ástæður á hverjum tíma,“ segir Hannes. Aðspurður hvort hann sé á leið út úr FL Group segir hann svo ekki vera. „Ég er alveg sallarólegur.“