Euromoney valdi Kaupþing besta banka á Íslandi

Kaupþing hefur verið valinn besti bankinn á Íslandi af alþjóðlega viðskiptatímaritinu Euromoney. Viðurkenningin var afhent fulltrúum bankans nýverið við hátíðlega athöfn í Lundúnum.

Í umsögn dómnefndar Euromoney segir meðal annars að Kaupþing sé stærstur íslensku bankanna og best búinn til að mæta þeim erfiðleikum sem nú herja á bankageirann. Þá hafi bankinn tekið rétta ákvörðun þegar hann hætti við kaupin á hollenska bankanum NIBC og jafnframt hafi Kaupþing brugðist hárrétt við athugasemdum greiningaraðila þegar bankinn jók lágmarkslausafjárstöðu sína úr 180 dögum í 360 daga.

„Það er alltaf ánægjulegt að fá viðurkenningar sem þessar. Sérfræðingar Euromoney fylgjast gaumgæflega með bankageiranum á Íslandi og því metum við þetta mikils," segir Jónas Sigurgeirsson, framkvæmdastjóri hjá Kaupþingi banka, í tilkynningu frá Kaupþingi.