Húsverðir helst að fá vinnu í fjármálafyrirtækjum?

Kaupþing auglýsir nú eftir rafvirkja í stöðu húsvarðar hjá Kaupþingi á ráðningaþjónustu Hagvangs. Á þessum samdráttatímum hafa fjármálafyrirtæki lýst því yfir að þau ætli ekki að ráða inn nýtt fólk. Varla er þó hægt að vanrækja viðhald húsa þannig að húsverðir eru án efa mikilvægir starfskraftar hvort sem kreppa er eður ei.

Starfið felst meðal annars í að sjá um húsnæði Kaupþings og umsjón minniháttar viðgerða. Hæfniskröfur felast í að að vera með sveinspróf í rafvirkjun, vera handlaginn, tölvulæs og góður í mannlegum samskiptum.

Besta leiðin til þess að fá atvinnu hjá bönkunum þessa dagana virðist fela í sér að vera handlaginn og hafa iðnmenntun. Því væri mögulega ráð fyrir viðskiptafræðinga eða hagfræðinga sem vilja komast að hjá bönkunum að skella sér í iðnnám.

Benedikt Sigurðsson upplýsingafulltrúi hjá Kaupþingi vildi ekki tjá sig um málið.