Oddaleikur hjá San Antonio og New Orleans

Meistarar San Antonio knúðu í nótt fram oddaleik í einvígi sínum við New Orleans Hornets í undanúrslitum Vesturdeildarinnar í NBA með 99-80 sigri í sjötta leik liðanna í San Antonio.

Oddaleikur liðanna verður því í New Orleans á mánudagskvöldið og þar verður leikið til þrautar.

San Antonio vann nokkuð öruggan sigur í leiknum í nótt og náði mest 24 stiga forskoti. Þetta var 20. leikurinn af 21 þar sem heimaliðið fer með sigur af hólmi í annari umferðinni í úrslitakeppninni.

Manu Ginobili var öflugur í liði San Antonio og skoraði 25 stig, þar af sex þrista, Tim Duncan skoraði 20 stig og hirti 15 fráköst og Tony Parker skoraði 15 stig.

Chris Paul fór að venju fyrir liði New Orleans með 21 stigi og 8 stoðsendingum, Tyson Chandler skoraði 14 stig, Peja Stojakovic 13 og David West skoraði aðeins 10 stig.

Tölfræði leiksins

West átti stórleik í fimmta leiknum í New Orleans, en lenti í villuvandræðum eins og Chris Paul í leiknum í nótt og þurfti svo að fara útaf í fjórða leikhlutanum vegna bakmeiðsla sem hafa verið að hrjá hann síðan í fimmta leiknum.

"Við vitum hvað er í húfi. Við eigum á hættu að vera slegnir út og því ætlum við ekki að gefast upp baráttulaust. Við mætum klárir í slaginn í oddaleikinn," sagði Tim Duncan hjá San Antonio.

San Antonio liðið hefur ekki horft fram á að vera slegið út í úrslitakeppninni síðan árið 2006 þegar liðið lenti 3-1 undir í einvígi sínu við Dallas, en kom þá til baka og tapaði oddaleik í framlengingu.

Ljóst er að eitthvað verður undan að láta í oddaleiknum á mánudaginn, en spútniklið New Orleans hefur haldið áfram að koma spámönnum á óvart í allan vetur.

Þá er bara að sjá hvort reynsla meistara San Antonio eða ungt og hungrað lið New Orleans hefur betur í úrslitaleiknum í einvíginu, þar sem sigurvegarinn mætir annað hvort LA Lakers eða Utah Jazz í úrslitum Vesturdeildarinnar.

Sjötti leikur Utah og Lakers verður sýndur beint á Stöð 2 Sport klukkan 02:30 eftir miðnætti í nótt. Þar hefur Lakers 3-2 yfir og getur tryggt sig áfram með sigri.

Þá gæti einnig dregið til tíðinda í einvígi Boston og Cleveland, en sjötti leikur liðanna verður sýndur beint á NBA TV rásinni á miðnætti í nótt. Þar hefur Boston yfir 3-2 í einvíginu en þarf að vinna fyrsta leik sinn á útivelli í úrslitakeppninni ef liðinu á að takast að komast í úrslit Austurdeildarinnar þar sem Detroit bíður átekta.

NBA Bloggið á Vísi