Hvetur fólk til að halda sér fast í efnahagsöldunni

Björgólfur Guðmundsson bað landsmenn að halda sér fast meðan efnahagsaldan skylli á okkur. Þetta sagði hann í ávarpi af tilefni af opnun Gestastofu Tónlistar og ráðstefnuhúss þar sem gestum gefst færi á að virða fyrir sér byggingu þessa risamannvirkis.

"Tónlistar- og ráðstefnuhúsið verður margslungið líkt og íslensk veðrátta. Eins og við vitum öll þá hvessir hressilega í íslensku efnahagslífi um þessar mundir. Þeir vindar blása líka niður við höfn," sagði Björgólfur.

Hann hvatti fólk til að halda sér fast.

"Meðan efnahagsaldan lemur á okkur af sem mestum krafti verðum við að halda okkur fast, vinna áfram af metnaði og öryggi en fara að öllu með gát. Vonandi harðnar ekki svo á dalnum að við þurfum að breyta áformum okkar hér. Við höldum áfram og siglum af festu inn í framtíðina með það að leiðarljósi að fylla Tónlistarhúsið af fólki og tónum og gerum það í trausti þess að efnahagsvindar breyti ekki áætlunum okkar og beri okkur af leið."

Á myndinni með fréttinni má sjá Björgólf ásamt Þorgerði Katrínu við gluggann sem vísar að hafnarsvæðinu. Glugginn er svo hreinn að halda mætti að þau væru "photoshoppuð" inn á myndina - en svo mun ekki vera.