Ódýrara að geyma gjaldeyri undir koddanum en í banka

Að mati Neytendasamtakanna er ódýrara fyrir fólk að geyma gjaldeyri sinn undir koddanum eða geymsluhólfi en á gjaldeyrisreikningi í banka.

Fjallað er um málið á heimasíðu Neytendasamtakanna. Þar segir að samtökin hafi fengið fyrirspurnir frá fólki sem hefur þurft að borga þóknun fyrir að taka út gjaldeyri af eigin gjaldeyrisreikningi.

Þegar gjaldskrár bankanna eru skoðaðar kemur í ljós að við úttekt á gjaldeyrisreikningi er innheimt þóknun sem nemur 1,5% af úttektarupphæðinni.

"Fólk er eðlilega ósátt við þetta gjald sem kemur flestum í opna skjöldu enda hefur úttekt á eigin fé hingað til verið gjaldfrjáls," segir í umfjölluninni um málið.

Eftir því sem Neytendasamtökin komast næst er Byr sparisjóður eini viðskiptabankinn sem ekki innheimtir þetta gjald.

Neytendasamtökin hafa sent bönkunum fyrirspurn og beðið um rökstuðning fyrir þessari gjaldtöku. Í svörum sem samtökin hafa fengið kemur fram að þóknunin sé vegna þeirrar áhættu eða þess kostnaðar sem bankinn verður fyrir við að liggja með gjaldeyri. Þetta telja Neytendasamtökin veik rök.

Ef bankinn ákveður að sýsla með gjaldeyri viðskiptavinanna á meðan hann er í vörslu bankans hlýtur áhættan að vera bankans. Ef bankinn græðir á viðskiptunum greiðir viðskiptavinurinn jú eftir sem áður þóknunina.