Jón Ásgeir: Eyði ekki tíma mínum í að hata aðra menn

Jón Ásgeir Jóhannesson starfandi stjórnarformaður Baugs segir að Baugur muni á næstunni flytja einhver íslenskra félaga sinna úr landi líkt og Vísir greindi frá 12. júní síðastliðinn. Sjálfur muni hann segja sig úr stjórnum allra félaga Baugs sem verða áfram innanlands innan fjögurra mánaða.

Þetta kemur fram í ítarlegu einkaviðtali við Jón Ásgeir í Sunnudagsblaði Morgunblaðsins. Meðal annars er rætt við Jón Ásgeir um Baugsmálið og þá sakfellingu sem hann hlaut í Hæstarétti.

"Jón Ásgeir kveðst oft hafa verið bitur og reiður á undanförnum sex árum því hann hafi oft verið beittur "ótrúlegum skepnuskap", Þessi tími hafi reynst honum og fjölskyldu hans mjög erfiður," segir í Sunnudagsblaðinu.

Aðspurður um hvort hann ætli í skaðabótamál gegn ríkinu segist Jón Ásgeir vera að íhuga það...."en karl faðir minn er alveg ákveðinn í að fara í skaðabótamál...Hann þurfti að ganga í gegnum þetta í fimm ár. Hann var algerlega sýknaður í málinu og hann er mjög harður á því að höfða mál," segir Jón Ásgeir.

Fram kemur í máli Jóns Ásgeirs að hann sé ekki í nokkrum vafa um að það hefði aldrei verið farið af stað með Baugsmálið á sínum tíma án þess að fyrir lægi samþykki æðstu ráðamanna landsins.

Jón Ásgeir segir að hann sé ekki hatursfullur maður. "Ég ætla ekki að eyða tíma mínum í að hatast við aðra menn og fórna þannig sálarró minni," segir Jón Ásgeir. "Ég get varið tíma mínum og starfsorku á miklu betri og uppbyggilegri hátt en þann."

Hinsvegar segir Jón Ásgeir að hann vilji búa þannig um hnútana að svona lagað geti aldrei gerst aftur. "Mér finnst vera aðalatriði að tryggja að málatilbúnaður í svona langan tíma með svona miklu offorsi, gerist aldrei aftur á Íslandi," segir Jón Ásgeir. "Ég er tilbúinn til þess að beita mér af krafti til þess að tryggja að svo verði."