Seðlabankinn breytir reglum um gjaldeyrisjöfnuð fjármálafyrirtækja

Seðlabanki Íslands gaf í dag út nýjar reglur um gjaldeyrisjöfnuð fjár­málafyrirtækja sem gildi taka 1. júlí næstkomandi.

„Meginbreytingin frá fyrri reglum er að misvægi á milli gengisbundinna eigna og skulda fjármálafyrirtækja skal mest nema 10% af eigin fé hverju sinni en var 30% í fyrri reglum," segir í tilkynningu frá bankanum. „Lægra misvægi, sem nýju reglurnar fela í sér, er ætlað að draga úr áhættu og stuðla að virkari verðmyndun gjaldeyris á millibankamarkaði."

Þá segir að til varnar neikvæðum áhrifum af breytingum á gengi krónunnar á eiginfjárhlutfall geti Seðlabanki Íslands „hér eftir sem hingað til veitt fjármálafyrirtæki heimild til þess að hafa sérstakan jákvæðan gjaldeyrisjöfnuð utan við almennan gjaldeyrisjöfnuð."

Stærstu við­skiptabankarnir, sem reka umsvifamikla starfsemi erlendis, hafa nú þegar slíka heimild frá bankanum.