Hlutfall kvenna í æðstu stöðum stærstu fyrirtækjanna hækkar hægt

Hlutfall kvenna í stjórnum æðstu fyrirtækja landsins hefur hækkað frá árinu 2007 en stendur eingöngu í þrettán prósentum sem gerir aðeins 61 af 467 stjórnarsætum samkvæmt upplýsingum frá Rannsóknasetri vinnuréttar við Háskólann á Bifröst. Hækkar þetta hlutfall um fimm prósent frá árinu 2007.

Konur eru í þriðjungi stjórnarsæta eða meira í samtals 29 fyrirtækjum en árið 2007 voru fyrirtækin tólf. Hins vegar hefur hlutfall fyrirtækja með enga konu í stjórn lækkað nokkuð og er nú 57 prósent í stað 71 prósent í fyrra.

Sé miðað við þau ellefu fyrirtæki sem eru á aðallista Kauphallarinnar eru konur eingöngu tíu prósent af stjórnarmönnum fyrirtækjanna eða sex talsins. Hjá þessum ellefu fyrirtækjum er enginn kona í stjórnarformannssætinu.

Konum hefur hins vegar fjölgað nokkuð sem æðstu yfirmenn og stjórnarformenn hundrað stærstu fyrirtækjanna. Sem dæmi eru þrettán konur nú stjórnarformenn í stað þriggja í fyrra og hlutfall æðstu stjórnenda hefur farið úr fjórtán prósentum yfir í nítján.

Elín Blöndal, forstöðumaður Rannsóknasetursins, segir greinilegt að fyrirtækin séu að reyna að bæta sig „en að þróunin sé heldur hægfara.“ Elín segir að hlutfallið hérlendis nokkuð lægra en hjá þeim löndum sem Ísland beri sig oft við og nefnir Noreg sérstaklega í því sambandi. Þar á bæ hafi fyrirtækið stungið aðra af varðandi jafnréttismál og sé hlutfall kvenna í stjórnum fyrirtækja í Noregi nú yfir 30 prósent.