Axel, Ingimundur og Sigurður Ari norskir meistarar

Elverum varð í dag norskur meistari í handbolta eftir afar óvæntan sigur á deildar- og bikarmeisturum Drammen í úrslitaleik um meistaratitilinn í dag.

Elverum vann tveggja marka sigur, 33-31, og leiddi með sama mun í hálfleik, 16-14. Íslendingarnir í liðinu áttu stórleik en Sigurður Ari Stefánsson skoraði átta mörk í leiknum og Ingimundur Ingimundarson sjö.

Markahæstur í liði Elverum var Steffen Stormo Stegavik með tíu mörk en hann hefur reyndar þegar samið um að leika með Drammen á næstu leiktíð.

Elverum skoraði fyrstu þrjú mörk leiksins og lét forystuna aldrei af hendi. Mest varð forystan í fyrri hálfleik fimm mörk en Drammen náði að jafna stöðuna, 24-24, þegar tæpur stundarfjórðungur var til leiksloka.

Sigurður Ari innsiglaði svo sigurinn með marki þegar sautján sekúndur voru til leikskloka og gríðarlegur fögnuður braust út í leikslok.

Axel Stefánsson er þjálfari Elverum og greinilegt að hann hefur unnið þrekvirki með Elverum sem varð í fimmta sæti deildarkeppninnar og þótti því fyrirfram ólíklegt til að vinna sigur í úrslitakeppninni.

Axel var þó látinn fara um miðja leiktíð og því ljóst að í dag var hans síðasti leikur með liðið. Hann hefur þjálfað Elverum í tvö ár. 

Samúel Ívar Árnason lék einnig með liðinu í vetur en hætti þegar hann flutti til Oslóar.

Elverum drógst gegn Runar sem varð í öðru sæti deildarinnar í fjórðungsúrslitum og vann þá leiki, 33-28 og 35-30. Í undanúrslitum lagði liðið Haugaland, 27-24, sem varð í áttunda sæti deildarinnar.

Gömlu handboltakempurnar Glenn Solberg og Frode Hagen léku sinn síðasta leik á ferlinum í dag en þeir hefðu sjálfsagt viljað ljúka ferlinum á betri nótum. Hagen var markahæstur leikmanna Drammen með tíu mörk en Solberg skoraði fimm.

Vísir óskar þeim Ingimundi, Sigurði Ara og Axel innilega til hamingju með þennan stórkostlega árangur.