Fá greitt 75,1% úr Skammtímasjóði Kaupþings

Hlutdeildarskírteinishafar í Kaupþingi Skammtímasjóði fá greitt úr sjóðnum í dag. Greiðslan nemur 75,1% af eignum sjóðsins miðað við 3. október 2008. Um heildargreiðslu er að ræða.

Upphæðin verður lögð inn á vörslureikning hvers hlutdeildarskírteinishafa í Nýja Kaupþingi banka hf. Vörslureikningurinn er innlánsreikningur.

Í tilkynningu um málið segir að vegna aðstæðna á fjármálamarkaði og tilmæla frá Fjármálaeftirlitinu hefur Rekstrarfélag Kaupþings banka hf. ákveðið að slíta sjóðnum. Slit sjóðsins miðast við 19. nóvember nk.

Þessar ákvarðanir voru teknar með jafnræði hlutdeildarskírteinishafa að leiðarljósi.