Viðskipti með skuldabréf 80% af heildarveltu ársins í Kauphöllinni

Nú þegar helmingur ársins er liðinn er veltan á árinu orðin 4.290 milljarðar og er það 31% meiri velta en á síðari hluta síðasta árs. Eins og fram hefur komið hefur verið gríðarleg velta með skuldabréf og er hún 80% af heildarveltu ársins.

Þrátt fyrir mikinn samdrátt í veltu með hlutabréf hefur veltan í tilboðabókinni haldið sínu nokkuð vel. Hér að neðan má sjá veltu með hlutabréf eftir ársfjórðungum og tegund veltu.

Í síðasta mánuði var mest viðskipti með bréf Kaupþings fyrir 35,3 milljarða, með bréf Landsbankans fyrir 22,4 milljarða og með bréf Glitnis fyrir 10,8 milljarða.

Úrvalsvísitalan lækkaði um 7,8% í mánuðinum og stóð í 4.377,29 stigum í lok mánaðarins. Frá áramótum hefur vísitalan lækkað um 30,7% og um 47,25% sé litið til síðustu 12 mánaða en hæst náði vísitalan í dagslok 18. júlí á síðasta ári (9.016,5 stig).

Kaupþing var með mestu markaðshlutdeildina með hlutabréf í mánuðinum 38,4% (29,9% það sem af er ári), þá kom Landsbankinn með 22,7% (19,2% það sem af er ári) og þá Glitnir með 14,5% (26,2% það sem af er ári).

Á skuldabréfamarkaðnum var Landsbankinn með mestu hlutdeildina í júní 23,6% (22,5% það sem af er ári), fast á eftir fylgir Glitnir með 20,9% (17,5%) og þriðju mestu hlutdeildina hafði Kaupþing eða 15,9% (24,2%).

Þetta kemur fram í tilkynningu frá Kauphöllinni.