Einkaneysla jókst um fimm prósent á fyrsta ársfjórðungi

Landsframleiðslan jókst um 1,1 prósent á fyrsta ársfjórðungi þessa árs miðað við sama tímabil í fyrra samkvæmt nýjum tölum Hagstofunnar.

Í riti sem kom út í dag kemur enn fremur fram að einkaneysla hafi aukist um rúm fimm prósent á milli ára og samneysla um 3,3 prósent. Hins vegar dróst fjárfesting saman um rúm fimm prósent, þar af dróst fjárfesting í íbúðarhúsnæði um 13,5 prósent. Fjárfesting hins opinbera jókst hins vegar um fimmtung.

Þjóðarútgjöldin jukust um 1,2 prósent á þessum fyrstu þremur mánuðum ársins og jókst útflutningur um 0,2 prósent en innflutningur um 0,4 prósent.

Tölur Hagstofunnar sýna enn fremur að árstíðaleiðrétt landsframleiðsla hafi dregist saman um 3,7 prósent frá fjórða ársfjórðungi síðasta árs til fyrsta ársfjórðungs þessa árs. Þar af dróst einkaneysla saman um eitt prósent og þjóðarútgjöld um 2,7 prósent.