Tæki Seðlabankans farin að virka

Greiningardeild Glitnis segir nýjar tölur Hagstofunnar um landsframleiðslu og þjóðarútgjöld sýna að hraðar hafi hægt á vexti hagkerfisins en Seðlabankinn gerði ráð fyrir í síðustu þjóðhagsspá sinni sem birt var 10. apríl.

Háir stýrivextir virðist loks farnir að bíta á heimilum og fyrirtækjum landsins sem verði að teljast góð tíðindi fyrir Seðlabankann. Bent er á að sérfræðingar Seðlabankans hafi gert ráð fyrir 5,7 prósenta vexti fjárfestingar í íbúðarhúsnæði á árinu en fyrstu tölur ársins bendi til mikils samdráttar.

„Þá spáði bankinn 2,2% hagvexti á árinu eftir 3,8% hagvöxt á síðasta ári. Seðlabankinn mun birta nýja þjóðhags- og verðbólguspá 3. júlí nk. sem jafnframt er næsti vaxtatilkynningardagur bankans. Við teljum að stýrivöxtum verði haldið óbreyttum og að Seðlabankinn hefji lækkunarferli stýrivaxta á haustmánuðum þegar enn skýrari merki eru komin fram um að farið sé að hægja á hagvexti hér á landi," segir í Morgunkorni Glitnis.