Greining Glitnis stendur við spá um 7% lækkun fasteignaverðs

Greining Glitnis spáir því að fasteignaverð muni lækka um 7% á árinu. Um er að ræða óbreytta spá greiningar frá í fyrra mánuði. Heldur spáin að mati greiningarinnar þrátt fyrir aðgerðir ríkisstjórnarinnar á fasteigna- og fjármálamarkaði.

Fjallað er um málið í Morgunkorni greiningar Glitnis. Þar segir að greiningin telji þó ekki að aðgerðir ríkisstjórnarinnar séu bitlausar. „Þvert á móti teljum við að þær muni varna frekari kólnun á íbúðamarkaði en nú þegar er í pípunum og flýta fyrir bata íbúðamarkaðarins þegar ytri aðstæður breytast til betri vegar," segir í Morgunkorninu.

Aðgerðir ríkisstjórnarinnar koma fyrst og fremst til móts við þann vanda sem lýtur að lausafjárþurrð á íbúðalánamarkaði. Lausafjárkrísan er þó ekki eini mótvindurinn sem íbúðamarkaðurinn stendur frammi fyrir um þessar mundir. Ekki má gleyma þeim áhrifum sem aukið atvinnuleysi, minnkandi kaupmáttur og aukin svartsýni neytenda hefur. Þá spilar mikið framboð íbúðahúsnæðis einnig stórt hlutverk í þeirri þróun sem framundan er og eykur þrýsting til verðlækkunar.

Loks spilar manntalsfræðin stórt hlutverk en gera má ráð fyrir að hægja muni á fólksfjölgun í kjölfar þess sem atvinnuleysi mun aukast og erlendir starfsmenn hverfa í auknum mæli af landi brott samhliða því sem eftirspurn dregst saman á vinnumarkaði. Jafnvel megi búast við fólksfækkun. Af þessum sökum geta aðgerðir ríkisstjórnarinnar einar og sér ekki snúið við þeirri þróun sem framundan er á íbúðamarkaði.