Krónan mun áfram eiga erfitt uppdráttar

Greiningardeild Glintis gerir ráð fyrir því að krónan muni eiga erfitt uppdráttar í bráð og að gengi hennar muni áfram einkennast af miklum sveiflum næstu mánuðina.

Í nýrri spá greiningardeildarinnar segir að erfiðar aðstæður á alþjóðlegum láns- og lausafjármörkuðum, lítil áhættulyst fjárfesta, slök uppgjör bandarískra fyrirtækja ásamt hækkandi skuldatryggingarálagi á íslenska ríkiðog bankana séu meginorsakir gengislækkunar krónunnar að undanförnu. Telur deildin að þróun gengis muni ráðast af aðstæðum á alþjóðlegum fjármálamörkuðum enn um sinn.

Greining Glitnis gerir enn fremur ráð fyrir að krónan fari að styrkjast þegar hilla fari undir lok þessa árs og að hún styrkist hratt þegar aðgengi að erlendu lánsfé eykst að nýju. „Ógjörningur er að tímasetja þær breytingar nákvæmlega fyrirfram. Við reiknum með því að Bandaríkjadalur verði í grennd við 77 krónur í lok þessa árs og evran verði nærri 118 krónum. Í árslok 2009 spáum við aðdalurinn verði tæpar 63 krónur og að evran standi í tæpum 98 krónum," segir í spá greiningardeilarinnar. Hún segir þó helstu óvissuþætti vera tímasetninguna á því hvenær fer að rofa til á alþjóðlegum lánamörkuðum. „Dragist krísan á langinn má reikna með veikari krónu út spátímann en hér er spáð,“ segir greiningardeildin.

Spá óbreyttum stýrivöxtum í júlí

Greiningardeildin spáir einnig í stýrivexti Seðlabankans og bendir á að verðbólgan nú sé 12,3 prósent. Mikla verðbólgu þessa mánuðina megi rekja til gengislækkunar krónu og hækkunar hrávöruverðs á heimsmarkaði. Telja Glitnismenn að hámarki stýrivaxta sé náð, en þeir eru nú 15,5 prósent, og vænta þess að bankastjórn haldi vöxtum óbreyttum á næsta vaxtaákvörðunarfundi, 3. júlí.

„Við spáum því að Seðlabankinn hefji vaxtalækkunarferli sitt í nóvember með 0,50 prósentustiga lækkun vaxta og að stýrivextir verði 15% í árslok. Þá reiknum við með örum vaxtalækkunum á næsta ári eftir því sem hjól efnahagslífsins fara að snúast hægar, einkaneysla dregst saman, bati verður á ytra jafnvægi þjóðarbúsins og dregur úr verðbólguþrýstingi, og að vextir standi í 8% í árslok 2009. Áður spáðum við að vaxtalækkunarferlið hæfist í september á þessu ári og að vextir yrðu komnir í 14,75% í lok árs," segir í spánni.

Gild rök fyrir vaxtalækkun fyrr og hraðar

Greiningardeilin segir enn fremur að færa megi gild rök fyrir því að rétt væri fyrir Seðlabankann að lækka vexti fyrr og hraðar en spá hennar gerir ráð fyrir, þar sem stýrivextir Seðlabankans bíti mun fastar nú eftir að aðgengi að erlendu lánsfé skertist og vísbendingar séu um að hagkerfið kólni nú mjög hratt. „Með því að halda vöxtum svona háum lengi er bankinn í raun að bregðast við neikvæðum ytri skilyrðum þjóðarbúsins, þ.e. þáttum sem stýrivextir bankans bíta ekki á og með aðgerðum sínum keyrir hann

hagkerfið niður í óþarflega mikla lægð. Við teljum þó að Seðlabankamenn líti þróunina öðrum augum en við og að vextir verði því líklega háir lengur en heppilegt væri, segir greiningardeildin að lokum.