Ríkisstofnanir lýstar með Osram-perum í tvö ár

Jóhann Ólafsson og Co., umboðsaðili OSRAM á Íslandi í 60 ár, undirritaði í gær samning við Ríkiskaup um sölu á ljósaperum til liðlega 650 fyrirtækja og stofnana á vegum ríkis og sveitarfélaga, sem í dag eiga aðild að rammasamningakerfi Ríkiskaupa.

Samningurinn er gerður í kjölfar útboðs sem auglýst var á Evrópska efnahagssvæðinu í maí síðast liðnum og er hann til tveggja ára. Heimilt er að framlengja samninginn tvisvar sinnum í eitt ár hvort skipti. Við mat á tilboðum var litið til þriggja meginþátta en það eru verð, þjónusta og hve breitt vöruúrval einstaka aðilar gátu boðið.

Samningurinn gildir frá 1. september næst komandi og tryggir öllum fyrirtækjum og stofnunum sem eru aðilar að rammasamningi Ríkiskaupa aðgang að fjölbreyttu úrvali hágæða ljósapera frá OSRAM á hagstæðum kjörum. Þótt ekki sé tilgreint hve mikið magn verður keypt á samningstímanum er ljóst að um umtalsvert magn verður að ræða.

"Við erum að sjálfsögðu ánægð með að hafa náð þessum samningi við Ríkiskaup því með honum nálgumst við mjög öflugan hóp stórnotenda." segir Guðmundur Pétur Yngvason markaðsstjóri á Lýsingasviði, Jóhanns Ólafssonar & Co.