Verulegur niðurskurður framundan hjá Sterling

Verulegur niðurskurður er framundan hjá Sterling flugfélaginu. Ætlunin er að segja 20% af starfsfólki félagsins upp störfum. Og fækka á flugsætum um rúm 12%.

Sterling er í eigu FL Group og Fons í gegnum Northern Travel Holding. Fjallað er um málið á vefsíðunni Business.dk í dag. Þar segir að metverð á eldsneyti og dvínandi eftirspurn valdi því að félagið grípi til þessara ráðstafana.

Rætt er við forstjóra Sterling, Reza Taleghani, sem segir að flugfélaginu blæði eins og öðrum flugfélögum í heiminum. "Það er takmarkað sem við getum gert til að auka tekjurnar og því verðum við að skera niður í rekstrinum," segir Taleghani.

Eigendur Sterling hafi ítrekað styrkt reksturinn með auknu fé. Nú síðast í byrjun júní er hátt í þremur milljörðum kr. var skotið inn í félagið. Þar var annarsvegar um að ræða tilfærsla á rekstrarfé upp á tæpa tvo milljarða kr. og hinsvegar ábyrgðarlán upp á um 750 milljónir kr.