Stýrivextir hækkaðir upp í 15 prósent

Bankastjórn Seðlabankans hefur ákveðið að hækka stýrivexti sína um 1,25 prósent og standa stýrivextir nú í 15 prósentum.

Fram kemur á heimasíðu bankans að forsendur verðbólguspár sem birtist í Peningamálum í nóvember síðastliðnum og hafi falið í sér óbreytta stýrivexti fram á síðari helming þessa árs hafi brugðist.

„Verðbólga hefur reynst mun meiri en spáð var og verðbólguvæntingar hafa vaxið. Eftirspurn hefur einnig verið meiri en búist var við. Gengi krónunnar hefur lækkað töluvert meira en reiknað var með í frá­viksspánni sem birt var í nóvemberhefti Peningamála. Í henni var gert ráð fyrir að brugðist yrði við slíkri þróun með hækkun stýrivaxta. Raungengi krónunnar er nú mjög nærri sögulegu lágmarki síðustu áratuga sem það náði í nóvember 2001," segir enn fremur á vef bankans.

Þar segir enn fremur að gangi lækkunin ekki til baka sé einsýnt að verðbólga aukist mikið og langvarandi verðbólguvandi sé fyrir stafni ef ekkert verði að gert með tilheyrandi víxlhækkunum verðlags, launa og gengis erlendra gjaldmiðla.

Bent er á að lækkun gengis krón­unnar undanfarnar vikur komi einnig illa við efnahagsreikninga skuldsettra heimila og fyrirtækja, sem grafi undan stöðugleika fjár­málakerfisins til lengri tíma litið. Því sé mikilvægt að gengislækkunin gangi sem fyrst til baka.

„Versnandi fjármálaskilyrði í heiminum hafa leitt til þess að erfiðara er en áður að fjármagna viðskiptahalla. Aðlögun í þjóðarbúskapnum með samdrætti eftirspurnar verður því tæpast umflúin. Hún verður því sársaukafyllri sem verðbólga fær að leika lengur lausum hala. Því er óhjákvæmilegt að reka áfram mjög aðhaldssama peningastefnu þannig að böndum verði komið á verðbólgu og verðbólguvæntingar og gengi krónunnar verði traustara í sessi," segir í tilkynningunni.

Vaxtaákvörðunardagurinn í dag er viðbótarvaxtaákvörðunardagur því samkvæmt áætlun átti bankinn ekki að tilkynna um vexti fyrr en 10. apríl. Það mun hann einnig gera og um leið verða gefin út Peningamál með nýrri þjóðhags- og verðbólguspá.